KALIBO, Aklan—Nagpaguwa it travel advisory ro Embassy of the Philippines in Paris sa mga Filipino.
Raya hay may kaangtanan sa natabong Yellow Vest protest, kon siin naapektuhan ro kalinungan ag seguridad it publiko sa nasambitang estado ag maging sa bilog nga nasyon it France.
Ro nasambitang protesta hay gina-organisa kada adlaw it sabado nga nag-umpisa sa katung-anan it buean it Nobyembre 2018.
Bangud kara, ginpadumdom it embahada ro mga Pinoy nga presenteng naga-istar ag nagatrabaho sa nasambitang lugar nga maging vigilante ag alerto agud nga malikawan nga masalisihan, mabiktima it mga manakaw ag mandurukot.
Nakabaehag sa nasambitang abiso nga likawan nga magpadueong sa mga lugar it Champs-Elysees, Arc de Triomphe, Louvre, Tuileres, Place Vendome, Avenue Friedland ag sa palibot it Avenue Kleber bangud sa mga lugar ngara ginapatigayon ro makangi-iedlis nga protesta.
Nakabaehag dugang nga inde magdaea it maabong kwarta ag mga maeahaeong kagamitan engkasong magguwa sa mga pampublikong lugar sa nasambitang nasyon.
Madumdumang kapin eon sa 122 katawo ro gin-aresto kasunod it mga ginakabaeak-an nga ginasueod eon it mga far-right ag far-left groups ro “yellow vests” movement.
Nag-ugat ro ginkasa nga hub-eag protesta it mga raliyista kontra kay Pres. Emmanuel Macron sa mataas sigon nga presyo it mga produktong petrolyo.
