KALIBO, Aklan—Gin engganyo it Banga Police Station ro publiko nga magdangop kanda agud nga insigidang maaksyunan ro andang mga reklamo kontra sa pagbinatasan it mga katapo it Banga Auxiliary Police ukon BAP sa pag-apprehend sa mga violators.
Suno kay P/Lt. Dax Santillan, deputy chief of police it nasambit nga taeatapan it pulisya nga owa man kanda it mga motorcycle rider nga nagpaabot it kapareho nga reklamo.
Mas mayad suno kana nga direkta nga mag-agto sa andang taeatapan agud nga maging “aware” man sanda sa reklamo kontra sa mga BAP eabi eon ro andang pagpatuman it laye.
Gindugang pa ni Lt. Santillan nga dapat nga maging marespeto ag maayos ro pagsita sa mga naga-eabag.
Sa pihak kara, ro mga BAP members suno kana hay gintaw-an it gahum sa idaeum it laye nga magpangdakop it mga violators nga naga-eabag sa mga ordinansa it munisipyo.
Apang kon may andang kakueangan hay pwede man raya nga maitama pinaagi sa pagtau kanda it nagakaigo nga training para sa mas maayos nga serbisyo publiko.
Kadungan kara, nag apela si Lt. Santiallan sa mga motorista nga sundon eamang ro batas-trapiko agud nga owa it rason agud nga sanda hay dakpon.
Nauna eon nga ginareklamo it ibang mga motorista ro abusadong pamaagi it pagdakop it mga BAP enforcers ag pilit nga pag-usoy it saea kanda.
Mag-eowas kara, ro sobra kataas nga pagnueoktan it penalty.
