KALIBO, Aklan—Ginsuhestiyon it Deparment of Education ukon DepEd-Aklan nga mas mayad nga direktang magpadaea it reklamo ro sangka mister sa andang regional director angot sa kasong adultery nga anang ginpasaka kontra sa anang misis nga sangka public school teacher nga gina alegar nga nakipag-relasyon sa sangka bagitong pulis.
Suno kay Dr. Miguel Mac Aposin, schools division superintendent it DepEd-Aklan nga ro regional director ro may otoridad sa pagdisiplina sa mga manugturo nga nagkasaea.
Apang pwede man sigon nga i-file ro complaint sa anang taeatapan agud nga mapadaea sa regional director nga imaw ro nagahimo it pinal nga desisyon.
Nauna kara, ginklaru ni Dr. Aposin nga hasta sa makaron hay owa pa sanda it may nabaton nga impormasyon angot sa nasambit nga isyu.
Depende man sigon sa kabug-at it reklamo antes nga madesisyon nga papunduhon temporaryo ro sangka manugturo sa anang trabaho.
Samtang, gin-insister ni Dr. Aposin nga bilang sangka manugturo , kinahangean nga maging mayad nga ehemplo sa tanan nga oras bangud sa ginatau nga pagrespeto it andang mga estudyante ag iba pa.
Mag eowas kara, bilang government employee, kinahangean man sigon nga magsunod sanda sa nakabaehag sa code of conduct and ethical standards for public officials and employees.
Madumduman nga ko nagliwan nga domingo hay nadakpan sa akto it mister nga OFW ro anang misis nga maestra nga kaibahan sa sueod it boarding house ro gina alegar nga kalaguyo nga sangka pulis sa C. Laserna St. Barangay Poblacion, Kalibo.
Ro daywa hay ginpahilway matapos nga makapagpiyansa sa kasong adultery, apang ro pulis hay gin-hold sa Aklan Police Provincial Office.
