KALIBO, Aklan—Nagpaabot it anang pakikiramay si Dr. Miguel ‘Mac’ Apusin, Schools Division Superintendent it DepEd-Aklan sa pamilya it nagbigti-patay nga sangka maestra maghalin sa banwa it Ibajay.
Suno kay Dr. Apusin nga ginakasubo nanda sa DepEd ro natabo sa manugturo nga si Ms. Mary Jane R. Jutic ag isaeang ka SPED Teacher I nga naka-assign sa Ibajay Central School, Barangay Poblacion sa nasambitan nga banwa.
Bangud kara, hay gineaygayan man nana ro tanan nga mga manguturo nga mag-usoy it mapangayuan it bulig kung may problema.
Ginpasiguro man kara nga magahimo it tikang ro DepEd-Aklan agud nga malikawan nga mauman pa ro makarondaya nga hitabo.
Madumduman nga ko nagtaliwan nga adlaw hay nasapwan eon lang ro 27-anyos nga maestra nga nakabitay ag uwa eon it kabuhi.
Una kara , nagsend pa sigon it mensahe ro manugturo sa anang kaparehong maestra nga magapakamatay imaw rason nga insigida nanda nga gin-impormahan ro anang pamilya agud masalbar raya sa anang plano nga pag-utas sa anang kabuhi.
Nagsimba pa sigon imaw antes nga ginhimo ro anang plano sa sueod mismo it eskwelahan kon siin imaw nagatrabaho.
Nakit-an man it Ibajay PNP ro pila ka mga suicide note nga anang gin-obra kamana man pila ka mga mensahe nga plano eon gid kara nga utason ro anang kabuhi.
Ginasugid nga raya eon ro pangaywang kahigayunan nga naghana nga magpakamatay ro nasambit nga maestra.
Sa pihak nga parte, ginpahayag man ni Dr. Miguel ‘Mac’ Apusin, Schools Division Superintendent it DepEd-Aklan nga nagpatuman sigon makarun it midyear break ro Department of Education.
Bangud kara hay owa anay it klase ro mga estudyante umpisa Enero 31 hasta Pebrero 5.
Samtang ro mga manugturo man hay may ginahimo nga mga aktibidadis sa eskuwelahan.
