KALIBO, Aklan—Naga-abot sa siyam ka mga anti-illegal drug operation ro ginkasa it Provincial Drug Enforcement Unit (PDEU)-Aklan ko nagtaliwan nga dag-on.
Suno kay Police Lieutenant Colonel Frenzy Andrade it PDEU-Aklan nga ro nasambit nga numero hay maghalin eamang sa operasyon nga andang ginpatigayun kung siin owa pa naeakip kara ro datus halin sa iba pang drug enforcement unit.
Kaabuan sigon sa andang operasyon hay ginkasa sa banwa it Kalibo.
Samtang, ro pinakamabahoe nga narekober hay idtu sa banwa it Ibajay nga ginakaeakipan it bulto-bulto nga shabu.
Apang, mas sangkiri sigon ro andang drug operation ag recovery ko nagtaliwan nga dag-on kumpara kat owa pa it pandemya.
Posible sigon nga nalisdan ro mga pusher nga magpuslit it kontrabando kasunod it ginplastar nga mga border checkpoint.
Ginpasiguro ni Andrade nga magapadayun ro andang monitoring makaron nga dag-on maskin sa mga barangay nga nauna eon nga gindeklarang drug cleared.
Ginatugyan man kara ro responsibilidad sa mga opisyales it barangay nga maging aktibo ag vigilante sa pagbantay agud nga mapabilin ro pagiging drug free it andang nasakupan.
