KALIBO, Aklan—Nagpanguna ro Altavas Municipal Police Station sa Performance Evaluation Rating (UPER) makaron nga buean it Mayo sa bilog nga probinsya it Aklan.
Nagpangibabaw ro nasambit nga taeatapan it pulisya sa 16 nga iba pang police units kon siin nasungkit nanda ro numero uno.
Suno kay Police Executive Master Sergeant Sharon Odoms it Altavas PNP, raya hay base man sa mga police initiated operation partikular ro pagkadakop nanda sa daywang most wanted person sa Palawan, surrendered loose firearms, striktong pag-implementar it ordinansa it lokal nga gobyerno ag maabong iba pa.
Ginpahayag dugang ni PEMS Odoms nga naangkon nanda ro kabilugang rating nga 99.02%.
Nauna eon nga ginhangaan ro Altavas PNP matapos nga ginasapopo nanda ro sangka eaeaki nga may deperensya sa paino ino kon siin ginlimpyuhan nanda raya it husto.
Mag-eowas kara, gintaw-an man nanda it cake ro most wanted person nga gin-aresto sa mismong kaadlawan kara.
