Nagapadayon ro enrollment it Department of Education ukon DepEd sa mga pampublikong eskwelahan nga nag-umpisa ko Hulyo 25 ag magatapos sa Agosto 22 para sa school year 2022-2023.
May kaangtanan kara, uman nga nag-apela si Dr. Feliciano Buenafe Jr. School’s division superintendent it DepEd Aklan sa mga ginikanan nga taw-an it tyempo ro andang mga inonga nga maipalista para sa ginaeauman nga face to face classes sandig man sa mando nga ginpaguwa it DepEd Secretary nga si Vice President Sara Duterte-Carpio.
Mag-eowas kara, may brigada eskwela man nga igapatigayon kon siin ginaengganyo ro mga ginikanan ag stakeholders nga boluntaryong makipagbahin sa nasambit nga aktibidad bilang pagpahaom sa school ground para sa andang mga inonga.
Samtang sa pihak nga parte, ginklaro ni Dr. Buenafe nga bukon eon it requirement sa mga learners nga magasueod sa pagbukas it klase ro pagiging bakunado.
Apang, ginaengganyo sa gihapon sanda nga magpaturok it covid-19 vaccine para sa proteksyon it andang kaugalingon kamana man kaparehong estudyante.
Kamana man gin-insister ni Dr. Buenafe nga uwa eon sanda nagastrikto sa pagsuksok it uniform it mga estudyante kasunod pahayag ni DepEd Secretary Duterte nga inde eon pag-irequired ro mga estudyante it uniform sa pagbukas it klase.
Apang, kinahang-ean nga malimpyo ag disente man nga eambong ro isuksok it mga inonga.
