KALIBO, Aklan–Ginpamalibaran it pamunuan it Land Transportation Office (LTO)-Kalibo nga may ginatanyag sanda nga online application sa pagproseso it lisensya.
Raya hay kasunod it ginpaabot nga reklamo it sangka senior citizen nga si Estelita Castro, 72-anyos it Brgy. Agbanawan, Banga kung siin kapin sa P32,000 ro nabuoe kana it nagpakilaea nga empleyado it gobyerno probinsyal nga si Prince Carl Ibañez it Brgy. Cogon, Lezo.
Suno kay Engr. Marlon Velez, Hepe it LTO-Kalibo nga personal ro pagproseso it sangka aplikante sa andang opisina bangud may ginatao sanda nga requirements.
Ro mga license applicant suno kana hay ginabue-an it personal data, litrato ag biometrics rason nga kinahang-ean nga personal nga mag-adto.
Suno kay Engr. Velez, owa imaw naga-tolerar sa mga makarondayang hilimuon eabi eon kung nagadaeahig sa pangaean it andang opisina.
Gin-engganyo man kara ro mga indibidwal nga maka-eksperyensya it kaparehong hitabo nga magpaabot it reklamo kanda agud nga ma-imbestigahan kabulig ro kapulisan.
Samtang, kung nagabuoe sigon it lisensya dapat hay direktang makipag-angot sa andang taeatapan para masayuran ro mga kinahang-ean i-comply.
Sa pihak nga parte, ginpaathag ni Engr. Velez nga may pagahiwaton sanda nga libreng theoretical driving course kabulig ro lokal nga gobyerno it Kalibo sa Setyembre 26 hasta 27.
Kaparte it programa ro pagtao it libreng certificates sa mga pumueoyo nga gustong mag-avail.
