Owa eon it pagpundo ro pagtaas it presyo.
Antes nga matapos ro dag-on hasta nga nagsueod ro 2023, sunud-sunod ro price hike.
Angot kara, nakataeanang magpaguwa it bag-ong Suggested Retail Price (SRP) sa mga nagapangunang baeak-eon ro Department of Trade and Industry (DTI).
Suno sa pamunuan it DTI, nakaangkon it epekto sa presyo it mga baeak-eon ro pilang hitabu kapareho it inflation nga naexperiensiyahan sa ibang nasyon.
Sambilog eon nga rason agud nga magpatuman it hugut nga price control hay ro desisyon it Department of Agriculture (DA) nga maga-import it mga pueang sibuyas.
Bagay nga sambilog sa mga ginakadismaya makaron it atong mga mangunguma.
Ham-an nga kon hin-uno ro harvest season, dayun nga maga-import ag bukon ko tiempo nga mataas ro demand ag kapos ro suplay?
Medyu makaangkon pa it kompetisyon ag makaeoeo-oy eon man ro mga local farmers.
Palpak eon man ro diskarte.
Angot sa ginaeauman nga pagpaguwa it bag-ong price matrix it mga nagapangunang baeak-eon , nagaeaum kita nga mapatuman raya ag mabantayan it mayad.
Nasayuran naton nga may pilang abusado ag ginagamit ro kahigayunan agud nga makapangloko.
Kinahangean nga doblehon ro kayod sa pag-tiyog sa mga baealigyaan agud nga owa it pasaway.
Mag-eowas sa tamang presyo, bantayan man ro timbangan ag kalidad it mga produkto.
Kon amat, sa kagustuhang kumita it iba, nagapangloko eon.
Tandaan naton, bukon it lisensya ro mataas nga presyo para magpang-abuso it isigkatawo.
Itau naton ro tamang presyo ag maayos nga produkto.
Sa tanan ngara, nagaeaum kita nga maeampasan man naton ro kapigaduhon.
Basta nga nagabueuligan ro tanan ag maduea eon ro mga pasaway, eabi eon sa gobyerno.
