POLICE Report — Una sa kritial nga kondisyon ro sangka 6-anyos nga unga nga babaye matapos nga gina-alegar nga ginbugbog ag ginbunggo ro ueo sa inidoro it nanay it anang kahampang sa Caloocan City.
Presenteng gina-obserbahan sa sangka ospital sa Quezon City ro biktimang si alyas Nene matapos magpaidaeum sa operasyon.
Arestado man ro suspek nga kaeapitbaeay it biktima nga makaron hay nakakulong sa estasyon it pulisya.
Suno sa unga it suspek nga kahampang it biktima sa sueod it andang baeay, nag-abot sigon ro anang nanay ag sa indi masayuran nga rason hay gulpi eamang kara nga ginbira ro biktima ag ginbayo it makapilang beses.
Owa pa sigon nakuntento ro suspek ag gin-guyod ro unga sa sueod it CR ag idtu hay gin-bunggo ro ueo it unga sa inidoro ag pader.
Kat mabatian it igmanghud it suspek ro sangag sa sueod it nasambit nga baeay hay insigida raya nga nagsueod ag idtu nana nakita ro duguan ag owa it alintro nga unga.
Presenteng ginapahaum it mga awtoridad ro igapasaka nga kaso kontra sa suspek.
