KALIBO, Aklan — Posibleng mabag-o ro klasipikasyon it Aklan sa mga lugar nga dapat tutukan it mga awtoridad makaron nga tiempo it eleksyon bangud sa natabu nga pagbaril-patay sa beteranong mamamahayag nga si Johnny Dayang.
Si Dayang hay ginbaril it owa pa nakilaea nga eaeaki samtang nakapungko sa rocking chair ag nagatan-aw it telebisyon sa sueod it anang baeay sa Villa Salvacion, Brgy. Andagao, Kalibo.
Suno kay Comelec Chairman George Erwin Garcia, buot hambaeon nga ro classification nga kulay green nga nagakahueugan nga matawhay pag-abot sa security concern hay posibleng mabutang eon sa kulay yellow, orange ukon red classification nga serious armed threat.
Ro Aklan hay presenteng sa green category.
Ro mga lugar nga una sa yellow category hay may kasaysayan it mga insidente nga may kaangtanan sa eleksyon sa nagtaliwan nga daywang eleksyon, posibilidad it paggamit it private armed groups, ag pag-angkon it mga insidente nga may kaangtanan sa eleksyon.
Nauna eon nga ginpahayag ni Garcia nga ginakabig it komisyon nga election related ro natabu nga pagbaril kay Dayang bangud nga gin-tiempo raya samtang nagahilapit ro eleksyon.
Apang nagapadayun pa suno kana ro imbestigasyon it mga awtoridad sa insidente.
Pila sa mga ginasundan nga anggulo it ginbilog nga Special Investigation Task Group (SITG) hay kun may kahilabtanan raya sa anang trabaho bilang mamamahayag, pulitika, personal ag iba pa.
Dugang pa ni Garcia nga pila sa mga isyu nga nagaputos makaron sa Aklan hay ro disqualification cases nga ginpasaka sa siyam nga mga kandidato sa ikaywang distrito it probinsiya.
