Sigidas ro pakikipag-angot it Aklan Police Provincial Office kabulig ro Kalibo Municipal Police Station sa intelligence ag PNP Regional Anti-Cybercrime Unit para sa madasig nga pagpasaka it kaso sa mga indibidwal nga responsable sa pagpakalhit it malisyoso ag pekeng bomb threats kontra sa nagkaeain-eain nga mga eskwelahan sa Aklan eabi eon sa nagkaeain-eain nga campuses it Aklan State University.
Raya ro ginpahayag ni P/Capt. Aubrey Ayon, tagapaghambae it APPO matapos nga gin-report kara nga may natumod eon nga Persons of Interest (POI) ro cybercrime units sa posibleng sa likod it krimen.
Sa oras suno kana nga makompleto ro mga nagakaigo nga dokumento hay pormal nanda nga igapasaka ro kaso.
Nasayuran nga nakatuga it disturbo sa klase ag trabaho kamana man kahadlok sa mga estudyante ag faculty and staff it mga eskwelahan ro mga nababaton nga anonymous bomb threat.
Bangud sa insidente hay awtomatikong ginakansela ro klase bilang pagsunod sa protocol, apang pagkatapos it pag-beripika hay negatibo sa pampasabog ro mga ginpadaehan it bomb threat nga mga eskwelahan.
Uman nga nagpaandam ro APPO nga ro pagpakalhit it saea nga impormasyon hay makabig nga seryosong krimen.
