Ginkumpirma it Department of Education (DepEd) Cavite Province ro pagkamatay it sangka Grade 4 nga estudyante it Hugo Perez Elementary School-Annex sa Trece Martires City matapos ro sangka deworming activity nga ginpatigayon sa sueod it eskwelahan ko Hulyo 2.
Nagpahayag it pakikisimpatiya ro DepEd sa pamilya it unga ag ginhambae nga nakikipag-angot eon sanda mga natungdan nga awtoridad kadungan ro pagpasiguro it bilog nga pakikipagbueuligan sa anumang legal nga proseso ag imbestigasyon.
Suno sa pamilya it waeong dag-on nga biktima, ginpa-inom sigon it anang class adviser it bueong nga pampurga bilang kaparte it school deworming program. Pag-uli it unga haya naka-eksperyensiya sigon raya it grabeng pagsakit it ueo ag tiyan, pauman-uman nga pagsuka, mataas nga eagnat, ag pagdugo it ilong. Gindaea imaw sa ospital apang binawian it kabuhi pagka-aga, Hulyo 3.
Nagapangayo it hustisya ro pamilya ag ginpamilit it ina nga owa kunta ginpa-inom it bueong ro anang unga bangud nga may dati raya nga baeatian.
Ginhinyu man nanda sa National Bureau of Investigation (NBI) nga magpatigayon it autopsy agud nga matumod ro matuod nga rason it pagkamatay ag matumod kun may saeabton ro sin-o man sa insidente.
