KALIBO, Aklan—Gin-aku ni Aklan 2nd district Congressman Teodorico “Ted: Haresco nga nagboto imaw it pabor sa anti-terrorism bill “with reservations ” sa isyu it national security policy.
Ro house bill 6875 ro bersiyon it kamara sa senate bill 1083 ukon ro anti-terrorism bill of 2020.
Ginklaru it kongresista nga ro nasambit nga proposisyon hay owa nagatuyo nga pugngan ro pag-alsa it mga aktibista ag pagpugong sa tawhanong kinamatarung it mga pumueuyu kundi nga matapna ro nga terorista nga nagatuga it kahalitan.
Nasayuran nga padayun nga naga-abu ro nagapanawagan nga ibasura ro anti-terrorism bill.
Raya hay pasado eon sa Kongreso, ag pirma eon lang ni Pangueong Duterte ro kinahangean agud nga eubus nga maging laye.
Gina-kwestiyon it mga nagakontra ro pilang probisyon it hagna kaibahan eon ro bukon it klaru nga kahueugan it “terrorism” ag “terrorist” ; pagiging legal it warrantless arrest; hasta 24 diyas nga pagkakulong; hugut nga surveillance sa sin-u man nga suspect nga magabuhay it pilang buean; kawad-an it saeabton it awtoridad sa unlawful detention, ag penalidad nga 12 anyos ag hasta nagakabuhi nga pagkakulong.
Makabig sigon raya nga eabag sa Konstitusyon ag mas pang magapa-euya sa demokrasya it nasyon.
May posibilidad man sigon nga maabuso raya it mga sueok sa gahum kapareho it natabu sa martial law.
