KALIBO, Aklan — Eubus nga kasubo makaron ro nabatyagan it mga miyembro it Aklan Press Club sa gulpihan nga pagkamatay ni Juan “Johnny” Dayang matapos nga ginbaril-patay samtang nagapungko sa anang rocking chair ag nagapamantaw it TV sa andang baeay sa Salvacion Village, Barangay Andagao, Kalibo bandang alas-8:00 it gabi-e it Martes, Abril 29, 2025.
Ro 89 anyos nga beteranong journalist hay bukon eamang it naging haligi it Aklan Press Club ag sangka respetadong tawo sa patag it media, kundi sambilog man imaw nga ama, mentor, ag abyan sa maabong tawo.
Ro anang dedikasyon, kasayuran ag nakakapukaw nga espiritu hay nag-aywan it inde mahuyap nga inspirasyon sa mga kabuhi it anang nabuytan.
Si Dayang hay ro longtime president ukon ginakabig nga Chairman Emeritus it Publishers Association of the Philippines Inc. (PAPI) ag hasta sa makaron hay may mga column raya sa pilang sikat nga mga peryodiko sa nasyon.
Mag-eowas kara, naging presidente man si Dayang it Manila Overseas Press Club (MOPC); director ag board secretary it National Press Club (NPC).
