KALIBO, Aklan— Importante ro selebrasyon it Araw ng Kagitingan agud nga dumdumon ro kaisog it mga Filipinong nakipagsukoe ag nagbuwis it kabuhi para sa nasyon maskin nga naghina ro depensa kato it Pilipinas sa Corregidor sa Bataan ko Abril 9, 1942.
Suno kay Atty. Plaridel Morania, sangka batikang abogado sa Aklan nga raya hay natabu ko Giyera Mondiyal Numero Dos kun sa siin gustong sakupon it Japan ro mga kaalyado it Amerika, kaibahan ro Pilipinas.
Agud nga indi eagi makasueod ro mga soldadong Hapon sa Manila, nagbutang it grabeng depensa ro nasyon sa Corregidor, ag kabulig ro mga soldadong Filipino ag mga soldadong Amerikano.
Ginpahayag ni Morania nga daeayawon ro ginhimo nga pagdepensa it mga soldado sa Corregidor bangud nga napabuhay nanda ro pagsakop it mga Hapones sa nasyon.
Apang ko Abril 9, 1942, gin anunsyo ro pagbagsak it Bataan.
Sa pagsurender it kapin sa 70,000 nga mga soldadong Pinoy ag Amerikano, natabu ro ginatawag nga Bataan Death March, kun sa siin masobra sa 20,000 nga mga soldado ro namatay.
Ginpabaktas sanda it masobra sa 100 kilometro halin sa Mariveles, Bataan hasta sa San Fernando, Pampanga.
Ag dayun nga ginsakay ag gindasok sa bagon nga paagto sa Camp O’Donnel sa Capas, Tarlac.
Angot kara, ginpadumdum ni Atty. Morania sa tanan nga pirmeng isipon ro ginhimo nga sakripisyo it mga baganihang Filipino para sa kahilwayan it nasyon.
