KALIBO, Aklan—Nagbiyahe eon paadto it London sanday Australian Prime Minister Anthony Albanese ag ro Governor General kaibahan ro andang mga asawa ag ro 10 nga mga Australians of the Year ag recipient it Victoria Cross.
Sanda ro mga delegado it nasyon nga magatambong sa state funeral ni Queen Elizabeth II sa Setyembre 19.
Matueopangdan nga sambilog ro Australia sa 14 commonwealth realms.
Ginpahayag ni Bombo International Correspondent Denmark Suede nga may tatlong parte it seremonya ro pagahimuon sa state funeral ni Queen Elizabeth.
Raya hay ginakaeakipan it state funeral nga pagatambungan it kapin sa daywang libong ka mga head of states bandang alas-11 it agahon (London time).
Samtang, pag-abot it alas-4 it hapon hay may pagahiwaton man nga aktibidad kaibahan ro 800 ka mga delegado nga ekslusibo eamang sa mga Prime Minister it Commonwealth realms ag monarch.
Pag-abot it alas-7:30 it gabi-i, dikara eon pagahiwaton ro private burial ukon pinal nga ritual kung siin iga-eubong eon ro reyna.
Ro bilog nga seremonya hay magabuhay it waeong oras ag tunga.
Sa pihak nga parte, ginaeauman nga ro Australian Ambassador to the UN ro magatambong sa pagahiwaton nga United Nations General Assembly.
Raya hay bangud kinahang-ean magbalik ni PM Albanese sa andang nasyon sa Setyembre 21 bangud pagka-agahon hay magadeklara imaw it National Day of Mourning.
