Madinaeag-on nga ginpatigayon ro inagurasyon ag blessing it bag-ong Standard Type B/C Municipal Police Station Building sa banwa it Numancia, bandang alas-2 it hapon it Biyernes, Hunyo 7, 2024.
Ro aktibidad hay ginpangunahan it Regional Director it Police Regional Office 6 nga si Police Brigadier General Jack Wanky, ag aktibong ginsaksihan ni Police Colonel Victorino Romanillos Jr., Provincial Director it Aklan Police Provincial Office, Local Government Unit ag iba pang hepe it nagkaeain-eain nga estasyon it pulisya sa Aklan.
Ginkaeakip sa aktibidad ro pagbaton it simbolikong yabe ni Numancia Mayor Jesryl Templonuevo ag Police Major Ronald Cesar, hepe it Numancia Municipal Police Station nga ginsundan it ribbon cutting ag blessing it nasambit nga istasyon.
Ro proyekto hay ginpondohan it Philippine National Police sa idaeum it General Appropriations Act.
Sa mensahe ni RD PBGen Wanky hay ginpasaeamatan kara ro tanan nga mga kaibahan sa pagpatindog it istasyon it pulisya, kasosyo sa komunidad ag mga stakeholder para sa andang padayun nga suporta paagto sa pag-angkon it sangka malinong ag eowas nga sosyudad.
Tuyo it proyekto nga mapamayad ro mga pasilidad, magtaeana it bag-ong imahe it istasyon, ag padayun sa paghatud it maayos ag epektibong serbisyo it numancia PNP agud nga mapabaskog ro kaeowasan ag kalinong sa komunidad.
Pagkatapos it inagurasyon hay amat-amat sanda nga magasaylo sa bag-ong building.
