KALIBO, Aklan — Dueueungan nga nagpatigayon it candlelight ro mga residente, Boracay Inter-Agency Task Force (BIATF) ag Dragon Boat community sa front beach it Barangay Manocmanoc, Boracay, kun sa siin namatay ro pitong paddlers it Dragon Force team kat kumueob ro andang ginasakyan nga baroto.
Raya ro ginkumpirma sa Bombo Radyo ni Boracay Inter-Agency Rehabilitation Management Group (BIARMG) general manager Natividad Bernandino matapos nga dueueungan nanda nga ginpangamuyo ro mga namatay sa insidente kaibahan ro andang natungdan nga mga pamilya nga nagapangasubo sa pagkamatay it mga raya.
Sa makaron hay temporaryong ginsuspinde ro dragon boat activities it ap-at nga grupo sa isla samtang ginatun-an pa ro andang practice ag training.
Samtang, sa ginpaabot nga mensahe sa Bombo Radyo ni Remedy Aquino, vice president it team nga nagapadayun ro andang pagtipon it bulig pinansiyal para sa mga biktima it trahedya.
Sa makaron hay nakatipon eon sigon sanda it haeos P400,000 halin sa nagkaeain-eain nga dragon boat federations ag pilang indibidwal sa bilog nga nasyon.
