KALIBO, Aklan—Nagaeaum si Aklan 1st district congressman Carlito Marquez nga maaprubahan eon it Senado ag mapirmahan bilang laye ni Pangueong Ferndinand Marcos Jr. ro anang gin-author nga Waste-to-Energy Bill antes nga matapos ro makaron nga dag-on 2024.
Suno kana nga umpisa nga magpungko sa manaba nga kapueongan it kongreso ko 2017 hay gindihon eon nana ro nasambit nga proposed bill apang pirmeng owa nakaka-eusot sa senado bangud sa kakueangan it tiempo.
Sa pag-refile nana sa nasambit nga hagna ko 2018 hay maabu sa anang mga kaibahan nga kongresista ro nag-co-author apang uman nga nabasura sa senado.
Nalipay suno kana imaw bangud nga si Pangueong Marcos eon mismo ro naghinyu sa insigidang pagpasa it anang Waste-to-Energy Bill.
Ginpahayag dugang nga sa ika-6 nga pueong it Legislative-Executive Development Advisory Council ukon LEDAC meeting sa Palasyo it Malacañang ko Setyembre, ginpamilit ni Marcos ro pagkinahangean nga uman nga tun-an ro nasambit nga bill bilang kaparte it flood control bangud nga seryoso eon ro problema sa basura.
Dugang pa ni Marquez nga gin aprubahan eon ro bill sa ikatlong pagbasa sa House of Representatives makaron nga 19th congress, apang naka-pending pa raya sa ikaywang pagbasa sa Senado.
Ginpahayag pa it kongresista nga ro Pilipinas eon lang sa bilog nga Asya ro owa it waste to energy facility.
Posible sigon raya nga maging solusyon sa maeapnagon nga pagbaha sa nasyon.
Ro natipon nga sangkaterbang basura hay pwedeng ma-convert sa energy ag maging source it elektrisidad.
Tuyo pa kara nga maka-comply eon ro pilipinas sa zero carbon emission nga gina-required it united nations sa bilog nga kalibutan hasta sa 2035.
