KALIBO, AKLAN —- Padayon nga ginabueong sa sangka pribadong hospital ro dating Ex Officio Member it SP Aklan matapos nabarilan samtang nagamaneho it anang saeakyan bandang alas-11:45 ro pang orason kabie.
Nakaangkon it tama it pagbaril sa waea nga alima ro biktima nga gin kilaea kay Antoy Solina, 60-anyos ag residente it Brgy. Linabuan Norte, Kalibo.
Ginpahayag nga samtang nagamaneho it anang kotse hay gulpi eamang imaw nga nakabati it sangka mabaskog nga eupok kun sa siin nataeopangdan eon lang kara nga may tama eon ro anang waea nga alima.
Bangud kara, nagdesisyon ro biktima nga magderecho sa Aklan Provincial Hospital agud nga ipatan-aw ro anang lastro apang, insigidang ginrefer sa sangka pribadong hospital para sa nagakaigong pagbueong.
Ro insidente hay padayun nga ginaimbestigahan it Kalibo PNP kun sa siin uwa pa sigon sanda it matumod nga motibo sa pagbaril sa biktima.
Nasayuran nga ro biktima hay dating ABC President ag sa makaron hay sangka contractor eon ag sangka negosyante.
