KALIBO, Aklan—Epektibo ko Lunes nga adlaw, Oktubre 17, ginpatuman ro daywang piso nga dugang sa pamasahe it Banga-Kalibo Jeepney Transport Cooperative.
Suno kay Rodrigo Almojen, Jr. chairman it nasambit nga transport cooperative nga ginpasaeamatan nanda ro pag-apruba it Land Transportation Franchising and Regulatory Board ukon LTFRB sa pagpataas it pamasahe sa mga pampublikong transportasyon.
Mabahoe sigon raya nga bulig sa atubang it padayun nga pagtinaas it presyo it produktong petrolyo ag inflation ukon pagtaas it presyo it mga nagapangunang baeak-eon.
Halin sa dating P22 pesos nga regular nga pamasahe hay naging P24 pesos makaron.
May 20% discount man nga ginatau sa mga estudyante, senior citizens ag persons with disability ukon PWD’s nga P18 pesos.
Sa pihak nga parte, gindugang pa ni Almojen nga owa man sanda it may nabaton nga reklamo halin sa andang mga pasahero bangud nga naintindihan man ro andang sitwasyon.
Mag-eowas kara, required sanda nga i-display ro andang fare matrix sa sueod it saeakyan agud nga maging guide it mga pasahero kon pila ro andang pagabayaran.
