KALIBO, Aklan—Nagapadayon ro pagtrabaho sa proyekto it Department of Public Works and Highways (DPWH) Aklan sa tunga it ginapangatubang nga pandemya tuga it Covid-19.
Suno kay District Engr. Leo Bionat it DPWH Aklan, una eon sa 30 to 40 percent accomplishments ro andang mga naunang proyekto kon sa siin ginpondohan raya it kapin sa 800 milyon pesos.
Ro nasambit nga proyekto hay ginakaeakipan it mga karsada, tulay ag iba pa.
Ginpahayag dugang ni Engr. Bionat nga may paaeabuton pa sigon nga 600 milyon pesos nga dugang nga pondo sa nasambit nga mga proyekto halin sa Department of Budget and Management (DBM).
Suno pa kay Engr. Bionat nga eubus nga naapektuhan ro andang mga nakaschedule nga proyekto makaron nga dag-on 2020 bangud sa pandemya apang anda sigon nga pagatinguhaon nga matapos antes magsueod ro dag-on 2021.
Bangud sa pandemya, kapin sa 1.4 bilyon pesos eon lang ro nakataeana nga pondo para sa DPWH sa Aklan sa baylo nga 2 bilyon pesos.
Apang, ro mga proyekto nga may pondo nga 5 milyon pesos hay uwa eon sigon raya pagbawasi.
Maskin may pandemya suno kay Engr. Bionat hay nagpadayon ro mga nakabinbin nanda nga trabaho halin kat ginbutang ro bilog nga probinsya it Aklan sa modified general community quarantine ukon MGCQ.
