KALIBO, Aklan – Nagahimas eon makaron it maeamig nga rehas ro sangka eaeaki matapos nga magpanghulikap it sangka menor de edad nga babaye sa guwa it sangka drug store sa Roxas Avenue, Kalibo.
Ginkilaea ro suspek Jesus Ibesate, 47-anyos ag residente it Brgy. Bakhaw Sur, Kalibo.
Ginasugid nga nagapaguwa sigon it nasambitan nga drug store ro biktima ag owa raya it kasuko-suko kung siin gulpi eamang raya nga gin-eapitan it suspek ag ginbuytan ro hita kara.
Hugot man nga ginapabalibaran it suspek ro alegasyon.
Suno kana, bukon man it sa maselan nga parte na ginbuytan ro biktima.
Pag-insister kara, nagwapahan eamang imaw sa babaye rason nga nahimo na raya.
Sa pihak nga parte, nasayuran nga may deperensiya ro suspek sa pinuino.
Raya ro ginkumpirma sa Bombo Radyo Kalibo ni Kagawad Apolonio it Brgy. Bakhaw Sur.
Sa makaron hay sa paghinakop eon makaron it Kalibo Police Station para sa nagakaigo nga disposisyon.
