Kalibo Aklan —–Ginpaidaeum eon sa inquest proceedings sa kasong pag-eabag sa inciting to sedition in relation to anti-cyber crime law sa Aklan Prosecutors Office ro 40-anyos nga habal-habal driver sa Isla it Boracay matapos mag-post ag mag-viral sa social media ro anang mensahe nga magatau it padya nga 100 milyon pesos sa sin-o man nga makapatay kay Pangueong Rodrigo Duterte.
Suno kay P/Lt. Alfredo Logarta, head it Criminal Investigation and Dectection Group (CIDG-Aklan) nga padayun nanda nga gina-verify kon may kamatuoran ro mga impormasyon nga gintau it suspek nga si Ronald Quiboyen, tubong Zamboanga, Sibugay ag halos limang dag-on eon nga naga-istar sa Isla it Boracay.
Nagtrabaho sigon raya ko una sa Isla bilang construction worker, apang kat magpundo ro andang trabaho bangud sa lockdown tuga it covid crisis hay nagtrabaho raya bilang habal-habal driver.
Ginasugid nga gusto eamang nga magpapansin it suspek rason nga gintupungan it P100 milyon pesos ro padya nga P50 milyon pesos it sangka public school teacher halin sa Zambales nga nag-post man it kaparehong mensahe sa anang Twitter account.
Apang nagapadayun pa sigon ro andang ginahimo nga imbestigasyon sa iba pang posibleng motibo ni Quiboyen.
Si Quiboyen hay naaresto pinaagi sa gintingub nga pwersa it Regional Anti Cyber Crime Unit 6, Regional Intelligence Division 6, Malay Police Station ag CIDG-Aklan bandang alas 7:00 ko gabi-i it Martes sa Vargas Compound, Sitio Hagdan, Brgy. Yapak sa nasambit nga Isla.
Kat pormal nga kasuhan, haeos napaeuha raya ag medyu ginhinoesuean ro anang ginhimo .
Samtang, ginpadumdum man nana sa publiko nga indi pag-abusuhon ro freedom of expression ag kinahangean sa gihapon nga maging madahan sa pag-post it mga mensahe sa social media eabi eon kon raya hay makatuga it kasakit ag alarma sa iba.
