Ginhinyu it Department of Education sa mga pampublikong eskwelahan nga hiwaton ro andang End-of-School-Year activities, nga nakataeana makaron nga domingo sa indoor venues agud nga maging haum umuean man ukon makaangkon it grabeng init.
Suno kay Mr. Hernani Escullar Jr., spokesman it Department of Education ukon DepEd-Region 6 sa idaeum it Memorandum 23-2024 nga ginpaguwa it DepEd ko Mayo 2, nakataeana dapat nga hiwaton ro End-of-School-Year rites umpisa Mayo 29 hasta 31, 2024, ag ginsuhestiyon nga hiwaton sa indoor venues ukon well-ventilated areas nga maeayo sa init it adlaw.
Tuyo kara nga masiguro ro kaeowasan ag proteksyon it learners, manugturo, ag mga magatambong.
Haum eon suno kana sa pagpatigayon it nasambit nga aktibidad ro kapin sa 4,057 nga mga public schools sa bilog nga Western Visayas.
Gintaeana suno kana ro bakasyon sa Hunyo 1 hasta 30 it mga manugturo samtang ro National Learning Camp hay sa Hulyo 1 hasta 19 ag ro mga co-curricular activities kapareho it Palarong Pambansa, National Festivals of Talent, National Schools Press Conference, Learners Convergence iba pa hay nakataeana sa Hulyo.
Samtang ro brigada eskwela hay sa Hulyo 22 hasta 27 ag ro pag-umpisa it school year 2024-2025 hay sa Hulyo 29.
Posibleng sa katung-anan it hulyo hay makapaguwa ro central office it school calendar.
Sa pangkabilugan hay naging maayos ag nakasunod sa mga guidelines ro tanan nga mga public schools sa Region 6.
