KALIBO, Aklan — Maswerte si dating Pangueong Rodrigo Duterte bangud nga may due process of law imaw nga gina-angkon maskin nga nakakulong.
Raya ro ginpahayag ni Bagong Alyansang Makabayan ukon Bayan-Aklan provincial coordinator Kim Sin Tugna sa pag-umpisa it confirmation of charges hearing ni Duterte, adlaw it Lunes, Pebrero 23 sa International Criminal Court sa The Hague, Netherlands.
Suno kay Tugna nga nataw-an it kahigayunan si Duterte nga maidepensa ro anang kaugalingon sa sangka patas nga korte.
Raya hay kabaliskaran sigon sa masalimuot nga inagihan it mga naging biktima it war on drugs it anang administrasyon nga owa nataw-an it kahigayunan nga mabatian ro andang parte.
Angot kara, kumpiyansa ro nasambit nga progresibong grupo nga mapasabat ro dating pangueo sa anang pag-eabag sa tawhanong kinamatarung ag mataw-an it hustisya ro pamilya it mga biktima.
Madumduman nga gintigsambilog it ICC Pre-Trial Chamber I ro tatlong crimes against humanity charges kontra sa dating pangueo sa unang adlaw it hearing.
Ro mga kaso hay ginaeakipan it murder as a crime against humanity sa Davao City ko tiempo it pagiging alkalde ni Duterte, nga may kabilugan sigon nga 19 nga biktima sa katung-anan it 2013 ag Hunyo 2016.
Ikaywa hay murder as a crime against humanity it “high-value targets” sa nagkaeain-eain nga lokasyon sa Pilipinas ko tiempo it anang pagka-pangueo, nga may 14 sigon nga biktima sa katung-anan it Hulyo 2016 ag Hulyo 2017.
Pangatlo, murder ag attempted murder as crime against humanity sa mga barangay clearance operation sa nagkaeain-eain nga parte sa nasyon ko tiempo it anang pagka-pangueo nga may 45 sigon nga biktima, kun sa siin 43 kara hay murders ag daywa ro attempted murders sa katung-anan it Hulyo 2016 ag Setyembre 2018.
Ro hearing hay kaparte it proseso it ICC agud nga kumpirmahon kun may bastante nga ebidensiya agud nga padayunon ro trial kontra sa dating pangueo.
