Posibleng faulty electrical wiring ro ginatan-aw nga rason sa natabu nga sunog sa sangka meat shop sa Osmeña Avenue, Barangay Estancia, Kalibo, bandang alas-2:54 it aga-aga it Biyernes, Pebrero 27.
Sa initial nga imbestigasyon it Bureau of Fire Protection ukon BFP Kalibo, ginpahayag ni FO2 Baldomero Imperial Jr., arson investigator it nasambit nga fire station nga nabugtawan it sangka empleyado it restaurant nga katabok it meat shop nga nagakaeayo eon ro atup it istraktura.
Nakakabit sigon ro mga electrical wires kara sa trusses nga himo sa light materials rason nga madasig nga nagkalhit ro kaeayo sa iba pang parte it meat shop .
Ginaboeobanta nga naga-abot sa ₱340,000 ro danyos sa natabu nga sunog, apang posible pang magtaas sa oras nga makasumite it affidavit of loss ro tag-ana nga si Mrs. Alma Patricio .
kaibahan sa mga naabo hay ro mga karne nga nakataeana kunta nga igabaligya ag iba pang mga gamit.
Eubusan nga natapna ro sunog bandang alas-3:13 it aga-aga, haeos sang oras matapos nga raya hay magtuhaw.
