KALIBO, Aklan—Narekober it mga awtoridad ro ginadudahan nga getaway vehicle it killer ag nag-hold-up sa empleyado it sangka cargo forwarding company nga si Jan Andrei Bolido.
Ro nasambit nga motorsiklo nga kulay itom hay ginasugid nga ginsurender mismo it ama it naarestong suspek nga si Delsol Zonio Jr., it Barangay Polo, Banga, Miyerkules it agahon, Mayo 1.
Natukiban nga matsa hungod nga ginpaeos ro plate number kat mabo-oe it kapulisan.
Suno kay P/ Capt. Benny Jones Mendoza, hepe it Banga Municipal Police Station nga raya hay joint operation it andang estasyon matapos nga makipag-angot kana ro hepe it Makato PNP agud nga marekober ro nasambit nga motorsiklo .
Madumduman nga sangka insidente it hold-up ag pagpamaril ro natabu sa guwa it opisina it J&T Express sa Barangay Dumga, Makato, Sabado it agahon nga ginkamatay it empleyado matapos nga ginbaril it suspek nga tinamaan sa kilid it anang eawas.
Pinaagi sa gahum it search warrant, natigayon nga mahaeughog ro kotse ni Zonio kun sa siin narekober ro 6 nga sachet it ginadudahan nga shabu.
Si Zonio hay nauna eon nga nagpaeagiw sa checkpoint nga gintukod it Banga Municipal Police Station sa Barangay Venturanza, Banga, gabi-i it Lunes, Abril 29 ag nadakpan sa sangka tago nga lugar sa Barangay Balactasan, Madalag.
Sa pag-body search, narekober sa suspek ro mga drug paraphernalia, masobra sa P23,500 pesos nga cash ag ID it J&T Express kun sa siin ko ulihi, natukiban nga nakatrabaho imaw bilang driver it nasambit nga kompaniya.
Nauna eon nga ginkumpirma it Makato Municipal Police Station nga ginakabig imaw nga person of interest sa pagpatay ag pag-hold-up kay Bolido.
Padayun pa ro pagtugis sa kaibahan it suspek nga driver it getaway vehicle.
