KALIBO, Aklan—Ginlaygayan it Akeanon scientists ro publiko nga kumalma eang anay angot sa Russian-made vaccine para sa SARS COV 2 ukon coronavirus disease 2019 ukon (COVID-19).
Suno kay Raymund Sucgang, Supervising Science Research Specialist it Philippine Nuclaer Research Institute (PNRI) nga indi pa mahambae sa makaron kon eowas ag epektibo ro ginbilog nga bakuna it Russia.
Nagabuhay sigon it pilang dag-on ro clinical trial it Food and Drug Administration ukon FDA ag Department of Health ukon DOH antes nga pasugtan ro bakuna bangud nga may pilang stages pa ro pag develop it bueong ukon bakuna man.
Problema man sigon it FDA ro kawad-an it virology research laboratory sa nasyon para sa maid-id nga pagtuon.
Nagaeaum si Sucgang nga maskin nga medyu epektibo ro nasambit nga Russian vaccine, nagpaandam gihapon raya nga indi pagmadalion ro paggamit agud nga indi mapareho sa naging kontrobersiyal nga dengue vaccine.
Ginpaathag pa ni Sucgang nga ro bakuna hay himo sa Gamaleya.
Raya hay sangka viral vector vaccine nga buot hambaeon nga nagagamit it ibang virus agud nga magdaea it DNA nga naga-encode it nagakaigo nga impormasyon sa immune response sa cells.
