KALIBO, Aklan–Kabilugan nga P500 million para sa 88,175 nga beneficiaries ro gintaeana it national government para sa bilog nga probinsiya it Aklan nga igatau nga ayuda sa mga pamilyang naapektuhan it enhanced community quarantine tuga it epekto it pag-eapta it coronavirus disease 2019 (COVID-19) sa nasyon.
Ginpaathag ni Evangeline Gallega, head it Provincial Social Welfare and Development Office ukon PSWDO Aklan nga raya hay kaparte it social amelioration program it gobyerno.
Kabulig sigon nanda ro mga lokal nga gobyerno sa maayos nga pag-distribute it social amelioration card form sa mga barangay sandig sa protocol it inter agency task force.
Ro mga card form suno kana hay may security features ag barcode ag owa man sigon ginabaligya.
Raya hay agud nga masiguro nga maka-abot ro ayuda sa mga target beneficiaries.
Daywang buean nga makabaton it bulig pinansiyal ro mga benepisyaryo sa idaeum it Bayanihan to Heal as One Act.
Ginpamilit ni Gallega nga in cash ag in kind ukon mga food packs ro mabaton nga ayuda it mga pamilya.
Pila sa mga qualified nga beneficiaries hay kaibahan sa low income family, drivers nga naduea-an it trabaho, mga tindera nga nagsarado ro baealigyaan , mga senior citizens, PWDs ag iba pa.
Apang anang ginklaru nga sa sangka household hay sambilog eamang ro makabaton it ayuda.
Bukon sigon it kaibahan sa social amelioration program ro mga miyembro it 4Ps.
