MALINAO, Aklan — Pinaagi sa pagtinguha it pamunuan it Malinao Municipal Police Station, naaresto ag nakakulong eon ro 42 anyos nga tanod nga ginaturo nga brutal nga nagbuno ag pumatay sa naka-away sa guwa it baylihan bandang alas-12:55 aga-aga it Sabado, Mayo 17, sa Brgy. Manhanip, Malinao kadungan it andang kapistahan.
Suno kay P/Lt. Alnie Fontenilla, deputy chief of police it Malinao MPS insigida nga nagkasa it hot-pursuit operation kontra sa suspek nga nakilaea ko ulihi kay Rolly Imperial nga naghatok-hatok it buno sa 50-anyos nga biktima nga si Adelaydo Isuga alyas Laido.
Ginpaathag it opisyal nga pinaagi sa mga tikang nga gina-obra it mga pulis hay na-locate ro ginakahimtangan it suspek.
Nauna eon nga naboe-an it panaysayon ro sangka testigo nga amigo ag kaibahan it biktima kat matabu ro krimen.
Base sa imbestigasyon, matapos nga nagguwa it baylihan mga 50 hasta 100 meters ro kaeayuon hay ginsundan sigon it suspek ro biktima ag ro anang amigo nga magabakae kunta it aeak sa baraka.
Ginhambaean ukon ginsita sanda nga indi eon magtuga it gulo sa sueod it baylihan ag mag-uli eon.
Bangud kara, nakaangkon it mainitan nga diskusyon ro magtimbang nga parte rason nga nagresulta sa pagbuno ro insidente.
Makapilang beses sigon nga ginbuno it suspek ro biktima sa nagkaeain-eain nga parte it anang eawas nga matsa may mabahoe gid nga kaakig rason nga naggueuwa kara ro anang mga internal organs.
Natukiban pa nga may dati eon nga banggi-anay ro daywa bangud sa away-pamilya .
Insigida nga nagpaeagyo ro suspek pagkatapos it krimen samtang ro biktima hay nadaea pa sa Aklan Provincial Hospital, apang gindeklara nga dead on arrival it nagtatap nga doktor.
Ro suspek hay residente it nasambit nga barangay samtang ro biktima hay taga-Brgy. Cabayugan, Malinao ag nagpamaylihan eamang sa lugar.
