KALIBO, Aklan—Nagapanindugan si Joey Bolina alyas Jojo Ricaforte nga self defense eamang ro anang ginhimo sa natabu nga road rage sa tunga nanda it 69 anyos nga si Emmanuel Ingalla sa Brgy. Bacan, Banga.
Sa interview it Bombo Radyo, ginpahayag ni Bolina nga ro naga-viral makaron nga video hay ro mga ulihi nga hitabu it andang komprontasyon.
Apang owa sigon naboe-an it video ro unang insidente kon ham-an nga nakaangkon sanda it nag-aeagawan it tubo it biktima sa tunga it karsada.
Ginsaysay nana nga samtang nagamaneho it anang motorsiklo pauli sa Barangay Poblacion hay gulping nagguwa ro tricycle nga ginamaneho it biktima halin sa eskenita sa may covered court it Bacan.
Nagtau sigon imaw it daean agud nga maka-una si Ingalla apang naglikaw raya sa samad nga karsadahon ag inagaw ro anang linya rason nga naaeang-aeangan ag sangkiri nga mabungguan it anang kasunod nga motorsiklo.
Aminado man ro suspek nga gin-abangan nana sa unahan ro tricycle it biktima agud nga istoryahon, apang gulpi sigon raya nga nagbo-oe it tubo ag ginhana imaw nga bunaeon rason nga anang inagaw ag habunae sa anang tangkugo.
Sa pihak nga parte, ginpamalibaran man nana nga may dati sanda nga bagina it biktima rason nga makapilang beses nana raya nga ginbunae it tubo.
Ulihi eon sigon nana nataeupangdan nga tatay it anang barkada nga si Michael ro anang naka-away kun sa siin hay ginbuligan nana raya nga mapasakay sa tricycle agud nga madaea sa ospital.
Aminado man ro suspek nga grabe ro anang paghinoesoe sa natabu ag nagapangayo imaw it pasaylo bangud nga nagulpihan eamang imaw.
Haum man sigon imaw nga atubangon ro anuman nga kaso nga igapasaka kontra kana.
