KALIBO, Aklan—Nagtau it padumdum ro pamunuan it St. John The Baptist Cathedral may kaangtanan sa reklamo it pilang indibidwal kun sa siin gina-alegar nga may pilang vendors nga sapilitan nga nagabaligya it mga religious items angot sa Sto. Niño de Kalibo sa festival zone area.
Suno kay Rev. Fr. Justy F. More, Chancellor it Diocese of Kalibo nga naka-abot eon kanda ro nasambit nga impormasyon kun sa siin kada selebrasyon it Sto. Niño Ati-Atihan hay may pilang indibidwal nga nagabaligya it mga medalyon, eskapularyo, ag agimat nga gina-angot sa Sto. Niño de Kalibo.
Ginklaru nana nga owa nanda ginabawae ro pagbaligya it nasambit nga mga religious items , apang dapat nga owa it halo nga pagpangloko.
Taktika sigon it mga raya nga gina-abangan ag ginataw-an it nasambit nga mga bagay ro mga naga-agto sa simbahan ag insigidang ginakabit sa andang mga eambong agud nga mapilitan sanda nga magbakae.
May kahigayunan pa suno kana nga ginapaeag it mga raya nga kon indi magbakae it andang baligya hay magatuga it kawad-an it grasya halin sa Sto. Niño.
Suno kana nga ro nasambit nga mga aktibidad hay owa it kaangtanan sa Roman Catholic Diocese it Kalibo, ag ro mga makarondaya nga klase it hilimuon hay owa nagasaeaming sa matuod-tuod nga espiritu it debosyon kay Sto. Niño.
Angot kara, gin engganyo nana ro tanan nga maging mapagbantay ag magdahan sa mga bentahoso nga nagabaligya.
Dugang pa nga kinahangean suno kana nga i-report sa kapulisan ro mga vendors nga pilitaryo ukon nagapamigos.
