KALIBO, Aklan—Bangud sa magkasunod nga pagka-aresto sa mga high value target sa probinsiya it Aklan kaibahan ro pagka-rekober sa bulto-bulto it shabu, mas pang nga pagapabaskugon it pulisya ro monitoring kontra sa illegal nga droga.
Raya hay kasunod sa pagka-aresto sa sangka High Value Individual (HVI) sa ginkasang drug buy-bust operation it Altavas Municipal Police Station, alas-7:00 agahon it Lunes, kun sa siin nakumpiska sa suspek ro ginatantiya nga P800,000 nga balor it shabu.
Ginkilaea ni P/Lt. Ryan Batadlan, acting chief of police it Altavas PNP ro suspek nga si Japhet Tornalejo, 27 anyos, sangka electrician ag residente it Jaro, Iloilo.
Gin-aresto ro suspek matapos magbaligya it ginadudahan nga ilegal nga droga sa nagpakuno-kuno nga police poseur buyer kabaylo ro marked money nga P22,500.
Nakumpiska kana ro 12 bilog nga plastic sachet it ginadudahan nga shabu nga nagabalor tanan it masobra sa P800,000, sangka bag ag motorsiklong gingamit sa operasyon.
Presenteng sa kustodiya it pulisya si Tornalejo nga nagapangatubang sa kasong pageabag sa RA 9165 ukon “Comprehensive Dangerous Drug Act of 2002.”
Nauna kara, madinaeag-on man nga naaresto ro magmaeanghud nga Clark ag Carl Tolentino ag sangka babaye nga ginakabig nga mga High Value Target sa ginpatigayon nga drug buy-bust operation sa sangka baeay nga gina-obra nga drug den sa Brgy. Sta. Cruz Biga-a, Lezo, Aklan ko nagtaliwan nga domingo kun sa siin nakarekober kanda ro 18 nga sachet it shabu nga nagabalor it kapin sa P550,000.
Aminado ro pulisya nga amat amat eon man nga nagakalhit ro ilegal nga droga sa Aklan sa pihak nga haeos tanan nga barangay kara hay gindeklara eon nga drug-cleared.
