KALIBO, Aklan — Naga-abot sa kapin sa 152,514 pamilya ukon 489,109 nga indibidwal halin sa 1,984 nga barangay sa Western Visayas ro naapektuhan it Bagyong Tino base sa dromic report no. 4 it Department of Social Welfare and Development (DSWD) Field Office 6.
Apang suno kay Therese Fely Legaste, public information officer it DSWD Region 6, posibleng madugangan pa ro nasambit nga numero bangud nga padayun pa ro andang pakikipag-angot sa mga apektadong local government units ukon LGU’s.
Nakalista ro DSWD it 76,773 nga pamilya ukon 246,535 nga indibidwal nga presenteng naga-istar sa masobra sa 3,000 nga evacuation centers, samtang 37,300 nga pamilya ukon 117,232 nga indibidwal man ro temporaryong naga-istar sa andang mga kakilaea ukon igbata.
Sa pihak nga parte, may nailista eon man sanda nga 10 nga baeay ro totally damaged ag 101 ro partially damage bangud sa mabaskog nga hangin ag uean nga daea it bagyo.
Nakapanupod eon ro DSWD it food ag non-food assistance sa mga apektadong komunidad ag nag-preposition it dugang nga supply sa mga LGUs nga naga-abot sa P24.48 milyon.
Nasayuran nga nagtaeana ro ahensiya it kapin sa P80.8 million nga balor it ayuda para sa mga apektadong residente nga tinamaan it bagyo sa rehiyon.
Dugang pa ni Legaste nga padayun ro andang assessment ag validation agud nga masiguro ro insigida ag maayos nga distribusyon it bulig sa mga pamilyang naapektuhan ni Bagyong Tino sa bilog nga region 6.
