KALIBO, Aklan — Umpisa eon makaron nga adlaw it Biyernes ro manhunt kontra sa mga owa nagsurender nga heinous crime convicts nga napahilway bangud sa good conduct time allowance ukon GCTA Law.
Raya hay kasunod it pagtapos it 15 diyas nga ultimatum ni Pangueong Rodrigo Duterte.
Nagbilog eon it 106 nga tracker teams halin sa Criminal Investigation and Detection Group (CIDG) agud nga arestuhon ro mga pugante nga owa nagsurender sa grace period.
Sa Western Visayas, ginpahayag ni P/Lt. Col. Jo-em Malong, tagapaghambae it Police Regional Office (PRO)-6 hasta alas-7:00 kabi-i, nag-abot eamang sa 66 nga heinous crime convicts ro nagsurender sa kabilugan nga 149 sa andang listahan.
Sa nasambit nga numero, 48 kara ro halin sa Panay island, 14 ro sa Negros Occidental ag ro 4 halin sa Bacolod.
Igaturn-over sigon nanda makaron nga adlaw ro mga convicts nga una sa andang kustodiya sa Sablayan Prison and Penal Farm sa Occidental Mindoro.
Nasayuran nga kaina it tungang gabi-i hay natapos eon ro 15 diyas nga palugit ni Pangueong Duterte sa mga convict agud nga ipresentar it uman ro andang kaugalingon para ma-validate kon natapos it mga raya ro andang sentensya ukon may anomaliya sa andang paghilway.
Nakataeanang igapaguwa it Department of Justice (DOJ) sa Department of the Interior and Local Government (DILG) ro revised list it mga paga-arestuhon agud nga malikawan ro mga kaso it mistaken identity.
