KALIBO, Aklan — Sa sueod it tatlong buean hay paga-okupahan ro tunga nga portion it karsada it Toting Reyes St. halin sa kanto it Roxas Avenue hasta F. Quimpo St. bilang temporaryong baealigyaan it mga naapektuhang vendors sa sunog nga nag-eontad sa Kalibo Public Market ko aga-aga it Setyembre 15.
Raya hay kasunod it pag-endorso ni Governor Florencio Miraflores sa resolusyon it Sangguniang Bayan it Kalibo sa provincial board angot sa nasambit nga plano.
Suno kay Engr. Jessie Figarido, head it Municipal Economic Enterprise Development Authority ukon MEEDO-Kalibo nga nagpa-abiso man sanda sa Department of Interior and Local Government ukon DILG sa atubang it mandu ni Pangueong Duterte nga limpyuhan sa anuman nga obstruction ro mga karsadahon ag sidewalk.
Ginpahayag dugang nga padayun nanda nga ginatumod ro numero it mga stall owners nga naapektuhan para sa pagpa-obra it mga tolda para kanda nga uniform ukon paeariho.
Target nanda nga maisaylo ro mga negosyante sa masunod nga domingo agud nga makabangon eon sa pagkalugi tuga it insidente.
Ginaeauman sigon nga sa sueod it tatlong buean hay ma-finalize eon nanda ro relocation site agud nga maisunod eon ro ginaduso nga total rehabilitation it tindahan.
Aminado man ro MEEDO head nga naapektuhan ro andang revenue bangud sa pagkasunog it haeos 80 porsiyento it tindahan.
