KALIBO, Aklan—Napurnada ro pagpatigayon kunta it kauna-unahan nga demonstration it vote-counting machine makaron nga adlaw matapos nga ginsuspinde ro sueod sa opisina it munisipyo it Kalibo tuga it naeksperyensiyhahan nga mga pagbaha kahapon nga adlaw it domingo daea it shearline.
Suno kay Atty. Christian Itulid, election officer it Commission on Elections ukon Comelec Kalibo nga paga-umpisahan kunta makaron nga adlaw it Lunes pagkatapos it pagahiwaton nga flag-raising ceremony it munisipyo it Kalibo ro roadshow caravan.
Nakapadaea eon sigon sanda it sueat sa Comelec central office angot sa cancellation it roadshow.
Apang anang ginpasiguro nga magapatigayon gihapon it demo it makina sa mga opisyal ag empleyado it LGU-Kalibo.
Madumduman nga ko adlaw it Biyernes, Nobyembre 29 hay nag-abot eon sa banwa it Kalibo ro automated vote-counting machine nga pagagamiton para sa roadshow caravan.
Sa pihak kara, ginpahayag ni Atty. Itulid nga maga-arangkada eon sa Disyembre 4 ro andang roadshow sa mga kabarangayan.
Raya hay paga-umpisahan suno kana sa Barangay Poblacion ag Mobo sa nasambit nga adlaw.
Sa Disyembre 5 hay magaderetso sanda sa Brgy. Old ag New Buswang ag sa Disyembre 6 hay sa Brgy. Bakhaw Norte ag Sur.
Magiging dere-deretso eon sigon ro andang pagahimuon nga roadshow caravan sa iba pang kabarangayan hasta sa enero it masunod nga dag-on mag-eowas sa December 11 hasta 13 .
Tuyo sigon kara nga matur-an ro mga botante angot sa mga bag-ong feature makina nga pagagamiton sa eleksyon sa Mayo 2025.
Angot kara, gin engganyo ni Atty. Itulid ro mga pumueuyu nga makiparte sa roadshow caravan agud nga makaangkon it first hand experience sa mga bag-ong makina.
Magapili suno kana sanda it lima hasta napueo nga katawo nga actual nga maga-shade sa balota ag magasueong sa makina.
Sa buean it Pebrero pagkatapos it demo hay uman sigon nga igabalk ro makina sa central office para sa re-calibration sa maabot nga eleksyon.
Mag-eowas nga user-friendly , kaibahan sa bag-ong feature it makina hay insigidang makita ro resibo kun sa siin nakabutang ro pangaean it mga kandidato nga ginbotohan pagkatapos nga masueong ro balota.
