Nakalista it all-time high it sobra P760 billion nga kita sa turismo halin sa international visitors ku 2024 suno sa Department of Tourism Secretary Christina Frasco.
Nagapakita sigon raya it magsobra 9% nga pagtaas halin sa 2023 visitor revenues ag 126% recovery halin sa 600 billion receipst ku 2019 o bago tumama ro pandemiya nga sambilog sa mga nakaapekto sa sektor it turismo.
Eksplenasyon it sekretarya, nga ro datos ngara hay nagapakita nga naeampasan eun it pagrekober it turismo it PH ro pre-pandemic numbers.
Angot kara, nagapabilin sigon nga uwa natitinag ro commitment it DOT para siguradahon ro pagtaas it numero it tourism arrivals sa atong nasyon.
Gin-eksplekar ni Sec. Frasco nga may pilang hangkat nga ginapangatubang ro PH nga nagresulta sa uwa pagkaabot sa targeted projection nga 7.7 million arrivals para sa 2024 matapos nga mailista eamang ro 5.9 million arrivals sa nagtaliwan nga dag-on.
Kat ginkutana man kat nakaapekto ro pagbawae it POGO sa nayson sa turismo it Pilipinas, ginpahayag ni Sec. Frasco nga eubos nga naapektuhan ro Chinese tourism market para sa Pilipinas bangud sa mga ginapataw nga restriksiyon sa electronic visa sa mga Chinese tourist base eun man sa datos kung nagnaba ro numero it mga Chinese tourists halin sa 1 million ku 2020 sa tunga it pandemiya sa magsobra 300,000 Chinese tourists nga nailista it 2024.
