KALIBO, AKLAN — Naga eaum ro Consulate of Republic of South Korea in Cebu nga masolbar insigida ro kaso ag mapasabat ro mga sa likod it kontrobersiyal nga pagpatay sa negosyanteng si Jee Ick Joo sa nasyun.
Suno kay consul Lee Yon Sang, indi sigon nanda malikawan nga magkahawag para sa mga kababayan nga sa Pilipinas bangud sa natabo kay Jee apang, owa gina bawaean ro mga Koreano nga magpadueong sa nasyun.
Nag apela man raya sa gobyerno nga taw-an it haega ro kaeowasan it mga Koreano sa nasyun ag mas pang mag strikto sa gina patuman nga kasuguan.
Gin pahayag dugang kara nga kuntento sanda sa mga tikang it gobyerno ag naga eaum nga mapadasig ro pag imbestigas sa kaso kun sa siin puros mga pulis ro nadaeasa kara.
Si Yon Sang hay nagtambong sa preliminary hearing sa kaso it pagkamatay it sangka Korean tourist sa Boracay bangud sa gina alegar nga kapabayaan it staff it sangka helmet diving company.
