KALIBO, Aklan–Kumpiyansa ro lokal nga gobyerno it Malay nga sanda ro magiging kauna-unahan nga siyudad sa probinsiya it Aklan.
Raya ro ginpahayag ni Alma Belejerdo, Secretariat it Technical Working Group para sa Malay cityhood.
Suno kana nga pursigido eon sanda nga iduso ro nasambit nga tikang bangud nga makaron eon sigon ro tamang tiempo.
Mag-eowas kara, mabaskog man ro andang buot bangud sa maabu nga suporta nga nababaton.
Madumduman nga sangka bill ro gindihon ni Aklan 2nd District Rep. Ted Haresco Jr. angot sa ginaproponer nga cityhood it Malay.
Nauna eon man nga nagpasa it resolution ro municipal council agud nga i-endorso ro conversion it banwa nga maging component city.
Matapos ro approval it house bill hay makaangkon pa sigon it plebesito ro mga pumueuyu it malay kun sa siin ginaeauman nga maging majority ro “yes vote”.
