KALIBO, Aklan—Maga-asister ro miyembro it Land Transportation Office ukon LTO sa mga kapulisan sa pagpatuman sa sueondanan it Department of Transportation ukon DOTr matapos nga ginbutang eon sa general community quarantine ro bilog nga probinsya it Aklan.
Suno kay LTO-Aklan head Engr. Marlon Velez, umpisa sa adlaw it Lunes hay magadeploy imaw it tawuhan nga maga-usisa sa mga daeanon ag terminals agud nga masiguro kon ginasunod it mga motorista ag drivers ro nakabaehag sa guidelines it DOTr kamana man sa ginpaguwa nga executive order ni Aklan Governor Florencio Miraflores para inde eon magkalhit pa ro 2019 coronavirus disease ukon Covid-19.
Ginklaro ni Engr. Velez nga kon ro violation it sangka motorista hay kaangot sa traffic laws, magapangdakop ag magapangtiket sanda apang kon ro violation hay kaangot sa GCQ, anda sigon raya nga igarefer sa natungdan nga pulisya para sa nagakaigong disposisyon.
Samtang, ginpaabot man ni Engr. Velez nga kon ro lisensya it driver ag ro rehistro it anang behikulo hay nag-expire during sa quarantine period hay pwede pa sigon raya nga magamit apang kon na-expire sa buean it Pebrero hasta sa unang dominggo it Marso hay inde eon raya pwede nga magamit pa.
Engkaso suno kana nga magabalik eon ro anda nga operasyon hay ro renewal eamang it rehistro ag driver’s license ro andang ginapasugtan nga i-proseso bangud sa mando man it national government nga ilimita ro andang operasyon kada adlaw agud nga matuman ro social distancing.
