KALIBO, Aklan—Hugot nga ginkondena it Aklan Police Provincial Office sa pagpamuno ni Provincial Director P/Col. Arnel Enrico Ramos ro brutal nga pagpatay sa batikang mamamahayag nga si Juan “Johnny” Dayang samtang nagapungko sa rocking chair ag nagapamantaw it television sa mismong panimaeay nana sa Villa Salvacion, Barangay Andagao, Kalibo bandang alas-8:00 it gabi-e it Martes, Abril 29, 2025.
Suno kay P/Capt. Aubrey Ayon, tagapaghambae it Aklan PPO, nagapadayon ro andang ginahimo nga back tracking sa kopya it mga close circuit television ukon cctv footages it before and after natabo ro insidente agud nga matumod ro mga posibleng suspek sa pagbaril-patay sa 89-anyos nga beteranong journalist.
Ginatan-aw sigon it pulisya ro tanan nga anggulo halin sa anang pagiging OIC mayor kon sa siin nagserbi imaw sa banwa it Kalibo ko March 1986 hasta it January 1987 hasta sa pagiging aktibo kara bilang mamamahayag bukon eamang it sa mga sikat nga peryodiko sa nasyon kundi maging sa mga social media platforms.
Suno pa kay Ayon, maid-id ro imbestigasyon nga andang ginahimo sa makaron agud nga maiserbi ro hustisya ag mapasabat ro una sa likod it nasambit nga krimen.
Nasayuran nga dead on arrival sa Aklan Provincial Hospital si Dayang matapos nga makaangkon it fatal nga tama it baril sa anang leog ag likod kon sa siin uwa eon raya nakahalin sa anang ginpungkuan nga rocking chair.
Si Dayang hay ro longtime president ukon ginakabig nga Chairman Emeritus it Publishers Association of the Philippines Inc. (PAPI) ag hasta sa makaron hay may mga column raya sa pilang sikat nga mga peryodiko sa nasyon.
Mag-eowas kara, naging presidente man si Dayang it Manila Overseas Press Club (MOPC); director ag board secretary it National Press Club (NPC).
