KALIBO, Aklan — Kadungan sa ika-ap-at nga dag-on nga pagdumdum sa pagpanaeasa it bagyong Yolanda, ginbatikos it mga militanteng grupo ag pilang Yolanda survivors ro administrastong Duterte.
Raya hay kasunod it proposisyon nga i-realign ro kapin sa P5-billion nga pondong owa nagamit para sa mga biktima it bagyo ko 2013 para sa rehabilitasyon it Marawi City.
Sa ginpatigayon nga general assembly, ginpahayag ni Kim Sin Tugna, provincial coordinator it Rise-Up-Aklan ag Bagong Alyansang Makabayan (BAYAN), bukon it makatarungan nga ro biktima it Yolanda ro magapanabat sa kremin nga ginhimo sigon it Amerika ag ni Pangueong Rodrigo Duterte sa Marawi.
Sa makaron suno kana hay haeos 20,000 pa eamang nga typhoon victims ro nakanaton it P5,000 nga Presidential Assistance Fund (PAF) okon 47 porsyento it masobra sa 42,000 nga benepisyaryo sa bilog nga probinsiya it Aklan.
Nag-apela ro mga raya nga itau eon ro masyadong atrasadong bulig pinansiyal sa mga biktima.
Madumduman nga ro PAF hay ginatau sa mga eligible nga Yolanda survivors kasunod it pagbasura sa kontrobersiyal nga Emergency Shelter Assistabce (ESA) ag Memorandum Circular 24 it Department of Social Welfare and Development.
