Dumagsa makaron nga adlaw ro mga debotong katoliko sa St. John The Baptist Cathedral ag iba pang mga simbahan agud nga saksihan ro pag-umpisa it Kuwaresma.
Ginpaathag ni Fr. Jude Rebaldo, kora paroko it St. Isidore The Farmer Church sa banwa it Nabas nga ginatawag makaron nga adlaw nga Miyerkules it Abo ukon Miyerkules Badlis kun sa siin nagabutang it abo sa dahi it mga deboto nga halin sa ginsunog nga benditadong lukay ko nagtaliwan nga Palm Sunday.
Raya hay sangka pagpadumdum sigon sa mga tumueuo nga kita hay magabalik sa alikabok bunga it mga kasae-anan it tawo.
Raya hay sambilog man sa mga simbolo it paghinoesoe ag pagbalik sa sabak it Diyos nga naghaead it anang kabuhi bangud sa mabahoe nga pagpalangga sa sangkatawuhan.
Samtang, gina-engganyo man kara ro mga Katoliko nga magpangamuyo, magpatigayon it fasting ukon magpu-asa eabi eon sa mga naga-edad it 18 hasta 59 anyos, maglikaw sa pagkaon it karne makaron nga Ash Wednesday ag sa Biyernes Santos apang mas mayad pa gid suno kana kon kada Biyernes hay magsakrispisyo nga indi anay magkaon kara, ag magtau it bulig sa mga nagakinahangean.
