KALIBO, Aklan—Posibleng madugangan it 6 ro numero it mga firecracker vendors sa probinsiya it Aklan nga nag-sekyar it permits agud nga makabaligya it andang produkto sa mga gintaeana nga mga firecracker zone it andang natungdan nga lugar.
Suno kay SFO1 Felinor Suco it Bureau of Fire Protection ukon BFP-Aklan nga on-going pa ro pag proseso sa permits it 6 nga vendors halin sa banwa it Kalibo.
Madumduman nga may nauna eon nga 29 ro nakaproseso it andang mga permits nga kaabuan kara hay naghalin sa banwa it Numancia ag Banga.
Gindugang pa ni SFO1 Suco nga nagapatigayon pa sanda it inspection sa mga ginaproponer nga baealigyaan it paeupok agud nga makasiguro nga nakasunod raya sa fire safety kun sa siin dapat hay maeayo sa panimaeay.
Required sigon ro mga 71 vendors nga magpatindog it andang stalls sa firecracker zone matapos nga makabo-oe it dokumento para sa andang permits.
Umpisa ko Disyembre 15 hay pwde eon nga makabaligya it mga paeupok.
Hasta sa makaron hay owa pa sanda it may nadakpan nga illegal nga nagabaligya it paeupok.
Ro mga vendors suno kana nga nagabaligya sa guwa it gintaeana nga firecracker zone hay pagapapanaugan it penalidad ag pagakumpiskahon ro andang mga produkto.
Gindugang pa kara nga ro mga firecracker vendors hay ginapaidaeum sa fireworks safety seminar nga ginapangunahan it Philippine Pyrotechnics Manufacturers and Dealers Association ag Philippine National Police.
Polisiya suno kana it PNP ag LGUs nga ro mga naka agi eamang it fireworks safety seminar ro pwdeng makabaligya it firecrackers ag iba pang pyrotechnic devices.
Nagaeaum man si SFO1 Suco nga kabay nga obrahon nga halimbawa ro pilang LGU sa aklna nga nagabawae nga magbaligya ag magpaeupok agud nga makaangkon it zero casualty.
