KALIBO, Aklan —Nagabaton eon it mga aplikante agud maging staff ro mga hotel ag resorts sa isla it Boracay para sa uman nga pagbukas kara sa mga turista sa Oktubre 26.
Suno kay Provincial Employment Service Office (PESO) –Aklan head, Vivian Ruiz-Solano, nagpatigayon sanda it job fair ko Agosto 7 para sa ginatos nga trabahong kinahang-ean para sa Boracay businesses.
May-una man sigon nga mga kompaniya ro nag-anunsyo it pilang mga posisyon para sa mga kwalipikadong trabahador.
Suno man sa Department of the Interior and Local Government (DILG), hasta sa Setyembre 30 it presenteng dag-on eon lang ro pag-comply it mga establisyemento sa isla para sa andang requirements.
Ro pila sa mga requirements nga kinahang-eanon hay environmental compliance, business, fire and sanitation permits ag kinahang-ean man nga maging labor compliance.
Nauna eon nga gin-anunsyo it Department of Environment and Natural Resources (DENR) nga ro reopening it Boracay hay sa Oktubre 26, an-om nga buean matapos ipasarado ro isla agud taw-an it daean ro rehabilitasyon.
