Ginturn-over sigon ro mga naimbolbar kahapon, Oktubre 9 it agahon sa nag-euntad nga rambol.
Pahayag ni Barangay Captain Niel Candelario nga gin-istorya nada ro mga naimbolbar ag pagkahapon man sigon hay nagdiretso sanda sa opisina ni Mayor Juris Sucro para man masolbar ro problema.
Nasayuran nga bangud eamang sa espiritu it alcohol imaw nga nagresulta sa uwa pagkaintindihan ro grupo nga nauna eun man nga magkilaea.
Uwa man sigon ro parehong parte nag-kaeasuhan kung siin nga nagpangayo lang sanda it pasenya sa kada isaea ag kay Mayor.
Nakasugtanan sigon nga magpublic apology ro mga suspek ag suno kay Mayor nga i-ban sanda kung maimbolbar pa sigon sanda sa mga masunod nga rambol.
Suhestiyon man nga kung may mga hilong sa sunod hay indi eun pasudlon sa sueod it festival zone.
Suno sa Kalibo PNP nga mahueog sa public scandal ro ginhimo it mga naimbolbar sa rambol.
Dugang pa ni Punong Barangay Candelario nga insigida man nga natumod kung sino ro mga suspek pagkatapos it nagtuhaw nga gulo.
Ginpasaeamatan man ni Kap Candelario ro katapo it kapulisan sa pagpanguna ni PLTCOL Ricky Bontogon sa insigida ag madasig nga pagresponde ku Opening Salvo.
Panawagan pa sigon nana nga iwasan ag kontrolon ro pag-inom it aeak sa paeaabuton nga Kalibo Sto. Nino Ati-atihan Festival 2024 agud nga indi mamantsahan ro imahe ni Senior Sto. Nino.
