KALIBO, Aklan—Eubus ro pagkabaeaka it mga residente it Barangay Tagas, Tangalan nga base daeayon nga mahugos ro andang mga panimaeay bangud sa sigidas nga pagkatiphag it eogta daea it pag-inuean ko mga nagtaliwan nga inadlaw nga nagresulta it mga pagbaha sa kasubaan.
Suno kay Roberto Vargas, naipaabot eon nanda sa mga natungdan nga ahensya ro andang problema bangud nga una nanda raya nga naeksperyensyahan ko nagtaliwan pang bagyong Yolanda.
Apang, ro naging resulta sigon hay sa unahan nagpatigayon it construction it revetment wall sa uwa masyado it panimaeay nga madaeahig sa pagkatiphag it eogta.
Rason nga uman sanda nga nagapanawagan nga aksyunan ro andang presenteng problema bangud klaro nga eubus sandang apektado eabi eon makaron nga tyempo it tinguean.
Samtang sa pihak nga parte, sa pangamuyo eon lang nagakapyot si Nelma Flores matapos nga sa bi-bi man it suba nahamtang ro anang baeay.
Koeba ag kahadlok ro anang nababatyagan sa kada magbaskog ro uean bangud nga maeapad eon ro kinaon it suba sa eogta nga andang nakahamtangan.
Ginpahayag dugang nga sigidas nga nagakatimpa ro eogta kapin eon kon mabaskog ro sueog it tubi rason nga apela nana sa natungdan nga ahensya it gobyerno nga taw-an it igtaeopangod ro andang ginapangatubang nga problema ag kunta inde eon paghueaton pang mawad-an sanda it ilistaran.
